കഥ ഇതുവരെ:
അന്ന് എന്നത്തേയും പോലെ
അസാധാരണമായി
ഒന്നും സംഭവിക്കാത്ത ഒരു പ്രഭാതം!
പ്രത്യാശയുടെ കിരണങ്ങളുമായി
സൂര്യന് കിഴക്ക്
കൃത്യസമയത്തു തന്നെ ഉദിച്ചു.
*** *** ***
ഇതുപോലെ പ്രശാന്തമായ
ഒരു ദിവസം അവര് വരും
'മൂന്നു പൊലീസുകാര്'
ശുഭ്രവസ്ത്രധാരികള്
ഒറ്റനോട്ടത്തില് മാലാഖമാരെപ്പോലെ
അകംപുറം പരിശുദ്ധം.
തുടര്ന്നു വായിക്കാം-
അധികമൊന്നുമില്ല,
എണ്ണത്തില് വെറും മൂന്നേ മൂന്നു പൊലീസുകാര്.
സാധാരണ വേഷത്തില്
ഇളം പുഞ്ചിരി തൂകിക്കൊണ്ടു
ഹൃദ്യവും സമ്പന്നവുമായ പെരുമാറ്റം.
പക്ഷേ, അവരുടെ കൈയില് ചങ്ങലയും ചൂരലും
കളിത്തോക്കുമുണ്ടാകാം
അവനെ അന്വേഷിക്കും-
വീടുവിട്ടുപോയവനെ,
കിളിവാതിലിലൂടെ പ്രഭാതം അന്വേഷിക്കുന്നവനെ,
പിന്നെ അവന്റെ പ്രിയപ്പെട്ട കൂട്ടുകാരിയേയും.
നിന്നെ അവര് സൂക്ഷിച്ചു നോക്കും,
മുടിയില് പിടിച്ചു വലിക്കും,
ബൂട്സ് കൊണ്ടു നിന്റെ ഗര്ഭപാത്രത്തില് തട്ടിനോക്കും.
ഒരിക്കലും നമുക്കവരെ കുറ്റം പറയാനോ,
ശപിക്കാനോ അവകാശമില്ല (അധികാരവുമില്ല).
അത്യാവശ്യമെങ്കില് ഇതവരുടെ 'കൃത്യനിര്വ്വണം'
എന്നുമാത്രം പറഞ്ഞൊഴിയാം,
അതും അടഞ്ഞ ശബ്ദത്തില്.
ചെവികേള്ക്കാത്ത നിന്റെ അമ്മായിഅമ്മയെ
'തള്ള' എന്നു നീട്ടി വിളിക്കും.
'മിണ്ടാതെ അവിടെ എവിടെയെങ്കിലും ചുരുണ്ടുകൂടി കിടന്നോ'
-എന്നു താക്കീതു നല്കും.
ഒരു ദിവസം അവര് വരും, പട്ടാളക്കാര്.
(നാട്ടില് അരാജകത്വം തുടച്ചുനീക്കി ക്രമസമാധാനം പുനഃസ്ഥാപിക്കാന്)
എണ്ണിത്തിട്ടപ്പെടുത്താനൊന്നും കഴിയാത്ത വിധം
കാലൊച്ചകളുടെ സമുദ്രം.
രാജ്യത്തിന്റെ അതിര്ത്തികള്,
അവരുടെ കൈകളിലത്രേ സുരക്ഷിതമായിരിക്കുന്നത്.
നിന്നെ നടുവിലകത്തു കൂടി വലിച്ചിഴച്ച് ഉമ്മറത്തേക്കു കൊണ്ടുവരും.
'വിധ്വംസക' പ്രവര്ത്തനങ്ങളുടെ സിരാകേന്ദ്രമായ ഈ വീട്
രാഷ്ട്രത്തിന് വേണ്ടി,
വാതിലുകള് ഉച്ചത്തില് തുറന്നടച്ചു-
ഭദ്രമായി പൂട്ടി മുദ്രവെക്കും.
നിന്റെ കണ്ണില് ചുട്ടു പൊള്ളുന്ന അരക്കൊഴിക്കും.
നിന്റെ പിണങ്ങുന്ന മുലകളെ
മൂര്ച്ചയുള്ള കത്തികള്കൊണ്ടു പതുക്കെ,
പതുക്കെ അരിഞ്ഞെടുക്കും.
മുറിവുണങ്ങാന് പച്ചമുളകരച്ചു പുരട്ടും
ഒരു ദിവസം അവര് വരും
അവര് ആരെന്നു നിനക്കൊരിക്കലും മനസ്സിലാവുകയുമില്ല
നീ അന്ധയും ബധിരയും മൂകയും കാലത്തിന് വേണ്ടി
അണിഞ്ഞൊരുങ്ങി കാത്തുനില്ക്കുന്നവളുമല്ലേ...
(തേജസ് 2003 ജനുവരി 16-31)
