ജനജീവിതം സ്തംഭിക്കുന്നതെങ്ങനെ
കുഞ്ഞുങ്ങള് കരഞ്ഞുകൊണ്ടിരിക്കുന്നു
ആര്ത്തലച്ചും കൈകാലിട്ടടിച്ചും..
ബസ് സമരത്തെപ്പറ്റി അവര്ക്കൊന്നും
അറിയുകയില്ല
കുഞ്ഞുങ്ങള് പിന്നേയും കരഞ്ഞുകൊണ്ടിരിക്കുന്നു.
തൊഴിലാളികളുടെ വേതന നിരക്കുകളെ-
ക്കുറിച്ചും അവര്ക്കറിയില്ല.
മന്ത്രിയുടെ സാന്നിധ്യത്തില് ഇന്നലെ രാത്രി
ടി.ബിയില് വെച്ചു നടന്ന ചര്ച്ചകളെകുറിച്ചും.
കുഞ്ഞുങ്ങളുടെ കരച്ചില് പിന്നെയും
ഉച്ചത്തിലാവുന്നല്ലോ!
അമ്മമാരുടെ അപേക്ഷകള്
അവര് തിരസ്കരിക്കുന്നു.
പിതാക്കളുടെ ശാസനകളേയും ധിക്കരിക്കുന്നു.
മൂന്നു ദിവസമായിട്ടും പാല്വണ്ടിയെത്താത്ത-
തെന്തെന്ന് അവര്ക്കറിയില്ല,
ജനജീവിതം സ്തംഭിക്കുന്നതെങ്ങനെയാണെന്നും.
ഇനിയും അവരെങ്ങനെയാണ് കരയുന്നത്?
ചേമ്പിന്തണ്ട് പോലെ വാടിത്തളര്ന്ന കുഞ്ഞുങ്ങള്....
കലാം വെള്ളിമാട്
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ